係倫敦生活，一定會接觸到倫敦地鐵。佢係全世界最早嘅地鐵系統，由1863年1月開始啟用。唔講唔知，當初決定係地下掘隧道起地鐵，係因為想避免路面使用權會產生嘅爭議。但去到起第一條地鐵時，都要拆咗大約一千間屋。起完之後，因為地鐵條隧道圓碌碌，所以大家就用咗「Tube」去稱呼倫敦地鐵喇。係第一次同第二次世界大戰嗰陣，倫敦居民就係靠依條地鐵嘅地下通道避難㗎。
Embankment 站 Mind the Gap 嘅故事我諗好多人都聽過，小編今次想講吓倫敦地鐵嘅Visual Design。係1920s開始，當時接管London Underground Railway嘅總經理Frank Pick委託 Edward Johnston 設計咗「UNDERGROUND」嘅企業招牌同「Johnston」字體，就係而家大家都好熟口面嘅紅圈藍底白字個招牌。而係1979年，Eiichi Kono係「Johnston」字體嘅基礎上進行改造，創造咗「New Johnston」字體，而倫敦交通局就一路用到而家。
最出名嘅倫敦地鐵路線圖，則係1933年由Harry Beck用業餘時間繪製而成。當時Harry Beck提出乘客唔需要知道過多細節，只需要搞清楚出發地點同目的地已經可以。當時個Design因為太Minimal，交通局嘅人其實唔認同依個諗法，但最後都通過咗個Design。而依個經典簡約嘅設計，更成為全世界地鐵都用使用嘅路線圖原型。而家係Finchley Central Station，你係可以搵返佢設計嘅原始地圖㗎！倫敦地鐵真係好多故事可以講，小編下次再同大家講多啲。
