經歷咗 2025 年下半年嘅觀望期，英國樓市正慢慢走出不確定性。
根據 Rightmove 最新房價指數報告，不少原本因為擔心財政預算案（Budget）而暫停買賣計劃嘅買家同賣家，正逐步重返市場。Rightmove 預期，隨着市場信心回復，2026 年住宅放盤叫價有望上升約 2%。
事實上，2025 年下半年市場轉慢，並非需求消失，而係「等緊方向」。當時市場流傳不少關於房地產稅務變動嘅消息，令部分買家變得審慎，賣家亦需要調整叫價去吸引買家。Rightmove 調查顯示，接近五分之一準買家，正正就係等緊 Budget 結果先再作決定。
而 Budget 過後，市場氣氛開始轉變。Rightmove 指出，傳統每年聖誕節後嘅「Boxing Day 回歸潮」，預計今年會比以往更加明顯，因為累積咗一批之前暫緩行動嘅買家與賣家。
另一個關鍵因素，係利率走勢。自 2022 年開始，按揭利率大幅上升，對置業人士造成壓力。不過，最新數據顯示，按揭利率已由高位回落，而英倫銀行亦預測，隨着通脹放緩，2026 年基準利率有望進一步下調。雖然減息步伐未必急速，但方向明確，有助改善整體置業負擔。
Rightmove 總結，2025 年屬於調整與等待的一年，而 2026 年，隨着利率回落、市場供應充足，加上信心逐步回升，英國樓市有望迎來較為正面的新階段。
如有任何英國物業資訊查詢，歡迎聯絡我們查詢！
*資料源自網絡
